Thiruvonum's Weblog

சிலப்பதிகாரம் –
நீல மேக நெடும் பொற் குன்றத்து பால் விரிந்து அகலாது படிந்தது போலே
ஆயிரம் விரித்து எழு தலை உடை அரும் திறல் பாயற் பள்ளி பலர் தொழுது ஏத்த
விரை திரை காவிரி வியன் பெரும் துருத்தி திரு அமர் மார்பன் கிடந்த வண்ணமும்
—என் கண் காட்டு என்று என் உளம் கவற்ற வந்தேன்

—————————————————————

தனியன் –
சிறப்பு பாசுரம் –
மணம் வாள் அரவிந்தைமார் நோக்க இம்மை மறுமையில் மா
மண வாளர் தம் பதம் வாய்த்திடும் கோயிலிலே வந்த அந்த
மண வாளர் பொன் திருப்பாத அம்புயங்கட்கு மாலை என
மண வாளர் சூடும் யமகம் அந்தாதியை வாசிமினே-

அடி சூட்டலாகும் அந்தாமம் –
செய்ய சுடர் ஆழியான் அடிக்கே சூட்டினேன் சொல் மாலை
கற்றினம் மேய்த்த கழல் இணைக் கீழ் –உற்ற திருமாலைப் பாடும் சீர் -போலே
வாள் -ஒளி

—————————————————————————–

1-காப்பு -விஷ்வக் சேனரும் -பஞ்சாயுதமும் –
ஓர் ஆழி வெய்யவன் சூழ் உலகு ஏழ் உவந்து ஏத்து அரங்கர்
கார் ஆழி வண்ணப் பெருமாள் அந்தாதிக்கு காப்பு உரைக்கின்
சீர் ஆழி அம் கையில் பொன் பிரம்பு ஏந்திய சேனையர் கோன்
கூர் ஆழி சங்கம் திரு கதை நாந்தகம் கோதண்டமே

——————————————————————————-

2-வையம் புகழ் பொய்கை பேய் பூதன் மாறன் மதுரகவி
யையன் மழிசை மன் கோழியர் கோன் அருள் பாண் பெருமான்
மெய்யன்பர் காற் பொடி விண்டு சித்தன் வியன் கோதை வெற்றி
நெய்யங்கை வேற் கலியன் தமிழ் வேத நிலை நிற்கவே –

——————————————————————————–

3-குரு பரம்பரை
சீதரன் பூ மகள் சேனையர் கோன் குருகைப் பிரான்
நாதமுனி உய்யக்கொண்டார் இராமர் நல் ஆளவந்தார்
ஏதமில் வண்மை பராங்குச தாசர் எதித் தலைவர்
பாதம் அடைந்து உய்ந்த ஆழ்வான் எம்பார் பட்டர் பற்று எமக்கே –

இந்த நூல் ஆச்ரியருக்கு பட்டர் ஆசார்யர் ஆகையாலே அவர் வரை அருளி
அவர் திரு தகப்பனாரையும் சேர்த்து அருளுகிறார்

———————————————————————————

4-திருமாலை யாண்டான் திருக்கோட்டியூர் நம்பி திருவரங்கப்
பெருமாள் அரையர் திருமலை நம்பி பெரிய நம்பி
அருமால் கழல் சேர் எதிராசர் தாளில் சிங்கா தனராய்
வரும் ஆரியர்கள் எழுத்து நால்வர் என் வான் துணையே –4

74 சிம்மாசனாதிபதிகளே சிறந்த துணையாவார் –

————————————————————–

5-நம் ஆழ்வார்
மால் தன் பராங்கதி தந்து அடியேனை மருள் பிறவி
மாறு அன்பர் ஆன குழாத்துள் வைப்பான் தொல்லை வல் வினைக்கு ஓர்
மாறன் பாராமுகம் செய்யாமல் என் கண் மலர்க் கண் வைத்த
மாறன் பராங்குசன் வாழ்க என் நெஞ்சினும் வாக்கினுமே-

மால் தன் பராங்கதி -விஷ்ணு லோகம் ஆகிய ஸ்ரீ வைகுண்டம்
பிறவி மாறு அன்பர் -முக்தர்

———————————————————————–

திரு அரங்கா உறை மார்பா திசை முகன் சேவிப்ப கந்
திருவர் அங்கு ஆதரித்து இன்னிசை பாட திருக் கண் வளர்
திருவரங்கா வுன் பழ அடியேற்கு அருள் செய்ய எழுந்
திரு வரம் காதலித்தேன் உனக்கே தொண்டு செய்வதற்கே–1

முதல் -வரி -திருவரங்கா -திரு அரங்கு ஆ -திரு மகள் தான் வசித்தற்கு இடமாக கொண்டு
இரண்டாம் வரி -திருவரங்கா தரித்து -கந்தருவர் அங்கு ஆதரித்து
மூன்றாம் வரி -திருவரங்கா -அவனையே குறித்து அருளி

நான்காம் வரி -திருவரங்கா -எழுந்திரு-உனக்கே தொண்டு செய்வதற்கு வரம் காதலித்தேன் = வரம் பெற ஆசைப்பட்டேன்-

——————————————————————————-

செய்யவளைக்  குருவின் இன்னருளால் திருத் தாள் வணங்கி
செய்ய வளைக்  குலம் சூழ் அரங்க ஈசன் சிறிது அமுது
செய்ய வளைக்கும் புவிக்கும் அங்காந்த செவ்வாய் முகுந்தன்
செய்ய வளைக்கும் சிலம்பு அணி பாதங்கள் சேர்ந்தனமே -2-

ஆச்சார்ய அபிமானமே உத்தாரகம் -என்று அருளி செய்கிறார் -இத்தால்
சேர்ந்தனம் -முன்னோரும் தாமும் -பின்னோரும்
முதல் வரி செய்யவள் -செந்நிறம் உடையவள் -அவள் தாளை வணங்கி -அவளைத் தாளாலே சென்று வணங்கி
இரண்டாம் வரி -செய்ய வளை -கழனிகளில் உள்ள சங்கினங்கள் சூழப் பெற்ற திருவரங்கம்
மூன்றாம் வரி -அளைக்கும் புவிக்கும் -வெண்ணெயையும் பூமியையும் உண்ண -அமுத செய்ய சிறிது அங்காந்த செவ்வாய் முகுந்தன்
நான்காம் வரி -செவ்வியை உடைய வளைந்துள்ள சிலம்பு அணிந்த திருவடிகளை சேர்ந்தனம்

செய்ய -சிலம்புக்கும் திருப் பாதத்துக்கும் அடை மொழி-

———————————————————————————

தனமாதர் அம் சொல் குதலை புதல்வர் தரணி இல்லம்
தனம் ஆதரம் செயும் வாழ்வு அஞ்சியே தஞ்ச நீ எனப் போந்
தனம் ஆ தரங்கிக்க வெற்பு எடுத்தாய் தண் அனந்த சிங்கா
தன மாதரங்கம் உள்ளாய் அரங்கா முத்தி தந்து அருளே —-3-

தரங்கிக்க -நிலை கலங்க -இந்த்ரன் பெய்வித்த மழையினால்
மாதரங்கம் -பெரிய கடலிலே
அநந்தன் -ந அந்த -பிரளயத்திலும் அழிவில்லாதவன்
ஆதரம் செயும் வாழ்வு அஞ்சியே-ஆசை கொள்ளுகிற நிலை யற்ற சம்சார வாழ்வுக்கு அஞ்சியே

———————————————————————————–

தந்தமலைக்கு முன் நின்ற பிரான் எதிர் தாக்கி வெம்போர்
தந்தமலைக் குமைத்தான் அரங்கேசன் தண் பூவினிடை
தந்தமலைக்கு தலைவன் பொற் பாதம் சரண் என்று உய்யார்
தந்தமலைக்கும் வினையால் நைவார் பலர் தாரணிக்கே ——-4-

முதல் வரி -தந்த மலைக்கு முன் நின்ற பிரான் -தந்தங்களை உடைய தொரு மலை போன்ற
யானைக்கு -கஜேந்திர ஆழ்வானுக்கு எதிரில் எழுந்து அருளி காட்சி தந்த பெருமானும்
இரண்டாம் வரி -எதிர் தாக்கி வெம்போர் தந்த மல்லைக் குமைத்தான் –
மூன்றாம் வரி -தண் பூவின் தந்து இடை அமலைக்கு தலைவன் -குற்றமற்ற திருமகளுக்கு கொழுநன்
நான்காம் வரி -அலைக்கும் தம் தம் வினையால் நைவார்
வெண்ணெய் வைத்துக் கொண்டு நெய்க்கு அழுவார் போலே சரண் புக்க மாதரத்தில்
சரணாகதருடைய கருமங்களை ஒழித்து முக்தி தருபவன் திருவடிகள் இருக்க

———————————————————————————–

தாரணி தானவன் பால் இரந்தான் சங்கம் வாய் வைத்து ஒன்னார்
தாரணி (தார் அணி )தான் அவம் செய்தான் அரங்கன் தமர்கள் பொருந்
தாரணி தான ( பொருந்தார் அணிது ஆன அமராவதியும் ) தரு நிழலும்
தாரணி தானம் அயிராவதமும் தருகினுமே——-5

தாநவன் -காசியப முனிவரது மனைவி தநு என்பவளது மரபினன்-அசுரனான மகாபலியிடம் நிலத்தை யாசித்தவனும்
அணிது -அணித்து -சமீபத்தில் உள்ள -இந்திர லோகம் அமராவதி மற்றவற்றை விட அருகில் உள்ளதால் –
அணிது -எளிது என்னும் பொருளிலும் கொள்ளலாம்
பாரிஜாத தருவை கொணர்கையில் எதிர்த்த -சங்க நாதத்தினால் பங்கப் படித்தினான்
மகா பாரத யுத்தத்திலும் சங்கு ஒலியால் அச்சப் படுத்தியும் -அறிவோம்

———————————————————————————-

தருக காவலா வென்று புல்லரைப் பாடித் தன விலை மா
தருக்கு ஆவலாய் மயிலே குயிலே என்று தாமதராய்
தருக்கா அலா நெறிக்கே திரிவீர் கவி சாற்றுமின் பத்
தருக்கு ஆ அலாயுதன் பின் தோன்று அரங்கர் பொன் தாள் இணைக்கே ——–6

தாமதராய் -தமோ குணத்தை உடையவராய்
அலாயுதன் -பலராமன்
அலா நெறி -துர் மார்க்கம்
சாற்றும் இன் பத்தருக்கு

——————————————————————————–

தாளத் தனத்தத்தைச் சொல்லியரால் வரும் தாழ் மல பா
தாளத் தனத்தத்தைத் தப்ப நிற்பீர்  புடை தங்கிய வே
தாளத்தன் அ தத்தை தீர்த்தான் அரங்கன்  சகடு உதைத்த
தாள் அத்தன் அத்தத்து ஐ ஆயுதன் பாதம் தலைக் கொண்மினே ——-7

தாளத் தனத்தத்தைச் சொல்லியரால் வரும் -கைத் தாளம் போன்ற
வடிவமுடைய கொங்கைகளையும் கிளி கொஞ்சிப் பேசுவது போலே
இனிய சொற்களையும் உடைய அயல் மாதர்களின் சம்பந்தத்தால் உண்டாகும்
தாழ் மல பாதாளத்து அ னத்தத்தை-ஆழ்ந்த அசுத்தம் பொருந்திய நரக துன்பத்தை தப்ப நிற்பீர்
புடை தங்கிய வேதாளத்தன் அ தத்தை தீர்த்தான் -எல்லாப் பக்கங்களிலும் சூழ்ந்து நின்ற
பூத கணங்களை உடையவனான சிவபிரானது -பிச்சை எடுதலாகிய -அந்த துன்பத்தை போக்கி அருளினவனும்
சகடு உதைத்த தாள் அத்தன் அத்தத்து ஐ ஆயுதன்-பஞ்சாயுதங்கள் ஏந்திய திருக்கைகளை யுடையவன்
பாதம் தலைக் கொண்மினே

—————————————————————————–

தலையிலங்கா புரம் செற்றான் அரங்கன் என் தாழ் சொல் புல்கு
தலையில் அங்கு ஆதரம் செய்த பிரான் சரண் அன்றி மற்றோர்
தலை யிலங்கா நின்ற கண் இலம் காண்கைக்கு தாழுகைக்குத்
தலை யிலம் காதிலம் கேட்கைக்கு வாயிலம் சாற்றுகைக்கே ———-8

தலையிலங்கா புரம் செற்றான் -தலைமை பெற்ற இலங்கை நகரை அழித்தவனும்
என் தாழ் சொல் புல்கு தலையில் அங்கு ஆதரம் செய்த பிரான் -என் இழிவான துதிச் சொற்களில் –
பொருள் சிறப்பு இல்லாத தம் மக்கள் பேசும் மழலைச் சொற்களின் இடத்தில்
தாய் தந்தை அன்பு கொள்ளுவது போலே விருப்பம் வைத்த பெருமான்

——————————————————————————-

கை குஞ்சரம் அன்று அளித்தாய் அரங்க மண் காக்கைக்குமாய்க்
கைக்குஞ்சரம் (கும் சரம் )அசரம் படைத்தாய் கடல் நீறு எழ து
கைக்குஞ்சர (கும் சர ) மகரம் குழையாய் எனைக் கைக் கொள் உடல்
கைக்குஞ்சரம  (கும் சரம ) தசையில் அஞ்சேல் என்று என் கண் முன் வந்தே —9

கை குஞ்சரம் அன்று அளித்தாய் -துதிக்கை உடைய யானையை -கஜேந்த்ரனை
அன்று
அரங்க மண் காக்கைக்கும் மாய்க்கைக்கும் சரம் அசரம் படைத்தாய் -ஜங்கமம் ஸ்தாவரங்கள் படைத்து
கடல் நீறு எழ துகைக்கும் சர -ஆக்நேய அஸ்த்ரத்தை வுடையவனே
மகரம் குழையாய்–எனைக் கைக் கொள் உடல் கைக்கும் சரம தசையில்-உடம்பை உயிர் வெறுத்து ஒழியும்படியான அந்திம தசையில்
அஞ்சேல் என்று என் கண் முன் வந்தே –

எய்ப்பு என்னை வந்து நலியும் போது அங்கு ஏதும் நான் உன்னை நினைக்க மாட்டேன்
அப்போதைக்கு இப்போதே சொல்லி வைத்தேன் போலே பிரார்தித்தவாறும்

——————————————————————————-

வந்தனை ஏற்றனை என் புன் சொல் கொண்டனை வன் மனத்தே
வந்தனை ஏற்று அனை யாவையும் ஆயினை வான் தர வு
வந்தனை யேற்றனைத் தானொத்த தாளில் வைப்பாய் பலித்து
வந்தனை யேற்றனைத் தீர்த்தாய் அரங்கத்து ,மாதவனே ———–10

யேற்றனை பலித்து வந்தனை தீர்த்தாய் -ரிஷப வாகனம் உடைய சிவ பிரான் இரத்தல் தொழிலை நீக்கி அருளினவனே
அரங்கத்து ,மாதவனே
என் வந்தனை ஏற்றனை
புன் சொல் கொண்டனை
என் வன் மனத்தே வந்தனை ஏற்று-வலிய மனத்திலே வந்து பொருந்தி
அனை யாவையும் ஆயினை-எனக்கு தாயும் மற்று எல்லா உறு துணையும் ஆயினை
வான் தர வுவந்தனை யேல்
தனை தானொத்த தாளில் வைப்பாய்-தன்னைத் தானே ஒப்பதான திருவடியில் சேர்த்து கொண்டு அருள்வாய்

————————————————————————————-

மாதங்கத் தானை யரங்கனை வஞ்சன் இலங்கையிலே
மாதங்கத் தான் ஐ யிரு திங்கள் தாழ்த்து பின்பு வாம் பரி தேர்
மாதங்கத் தானை வலத்தானை முன் வதைத்தானைத் தன் பான்
மாதங்கத்தானை வைத்தானை வைத்தேன் என் மதி யகத்தே ——–11

மாதங்கத் தானை யரங்கனை வஞ்சன் இலங்கையிலே –
சிறந்த மாற்றுயர்ந்த பொன் மயமான ஆடையை உடைய திருவரங்கனும்
வஞ்சகனான இராவணனுடைய இலங்காபுரியிலே –
மாதங்கத் தான் ஐ யிரு திங்கள் தாழ்த்து பின்பு வரம் பரி தேர் –
திருமகள் அவதாரமான சீதா பிராட்டி தங்கி இருக்க -மா தங்க -தான் -பத்து மாதம் கழித்து
பின்பு தாவிச் செல்லும் குதிரைகளும் தேர்களும்
மாதங்கத் தானை வலத்தானை முன் வதைத்தானைத் தன் பான்
யானைகளும் காலால்கள் ஆகிய சேனை யின் பலத்தோடு மற்றும் பல்வகை வலிமைகள் உடைய இராவணனை
முற்காலத்தில் அழித்திட்டவனும்
மாதங்கத்தானை வைத்தானை வைத்தேன் என் மதி யகத்தே –
மாது அங்கத்தானை தன் பால் வைத்தானை -திருமாலை எனது மனத்தின் உள்ளே
நிலையாக வைத்திட்டேன் –

-தங்கத்தானை =பீதாம்பரம் என்னும் பொற்றாடை –
-வாம் =வாவும்
மூன்றாம் அடி மாதங்கம் -மதங்க முனிவர் இடத்தில் நின்று ஆதியில் உண்டானது
என்று காரணப் பொருள்
வலம் -வரபலம் புஜபலம் ஆயுதபலம் மனோபலம் ஸ்தான பலம் முதல்வன
வளம் -வெற்றியுமாம்
பிறை தங்கு சடையானை வலத்தே வைத்து இருக்கும் திருமால்
வலத்தனன் திரிபுரம் எரித்தவன்
மதி யகத்து -அறிவிலே என்னுமாம்
அம்பிகையை ஒருபாகத்தில் வைத்தவனை -தனது ஒரு பாகத்தில் வைத்தவனை
எனது அகத்து உறுப்பினுள்ளே வைத்தேன் யான் -சமத்காரம் தோன்ற அருளுகிறார்

———————————————————————————–

மதிக்கவலைப் புண்ட வெண்டயிர் போல மறு குறு மென்
மதிக்கவலைப் புண்டணி கின்றிலேன் மண்ணும் வானகமும்
மதிக்கவலைப் புனல் சூழ் அரங்கா நின் மனத்தருடா
மதிக்கவலைப் புன் பிறப்பினி மேலும் வரும் கொல் என்றே —–12

மண்ணும் வானகமும் மதிக்க-
அலைப் புனல் சூழ்
அரங்கா
நின் மனத்தருடா மதிக்க=நின் மனத்து அருள் தாமதிக்க
வலைப் புன் பிறப்பினி மேலும் வரும் கொல் என்று = வலை புல் பிறப்பு இனி மேல் வரும் கொல் என்று சிந்தித்து

மதிக்கவலைப் புண்ட வெண்டயிர் போல மறு குறு மென் மதிக்கவலைப் புண்டணி கின்றிலேன்-
மதிக்க அலைப்புண்ட வெள் தயிர் போலே =கடைதலால் அலைக்கப் பட்ட வெண்மையான
தயிர் போலே ஒரு நிலை நில்லாது சுழல்கிற என் மனதின் கவலையாகிய விரணம்
ஆறப் பெற்றிலேன் -புண் தணிகின்றிலேன்-

எனது கவலை தணியுமாறு எனக்கு நல் கதி அருள வேண்டும் என்பதாகும்
வலை மிருக பஷிகளைப் பந்தப்படுதுவது போலே பிறப்பு உயிரை பந்தப்படுதலால்
வலைப்புன் பிறப்பு எனப்பட்டது-

————————————————————————————

வருந்து வரைப்பட்ட மங்கையர் எண்மர் மனங்களைக் க
வருந்து வரைப்பட்ட வாய் அரங்கேசனை வஞ்சப்பகை
வருந்து வரைப்பட்ட வேழம் அட்டானை மறந்து உலகோர்
வருந்து வரைப்பட்ட வீப்போன் மடந்தையர் மால்வலைக்கே ——–13

வருந்து வரைப்பட்ட மங்கையர் எண்மர் மனங்களைக் கவரும் =
துவரை வரும் பட்ட மங்கையர் எண்மர் மனங்களைக் கவரும்
துவரைப்பட்ட வாய் அரங்கேசனை துவர் ஐ பட்ட -=செந்நிறத்தை பொருந்திய வாய் அழகை உடைய ரெங்கநாதனும்
வஞ்சப்பகை வருந்து -வஞ்சப்பகைவர் உந்து -தன்னை நோக்கிச் செலுத்திய
வரைப்பட்ட வேழம் =மலையை ஒத்த குவலயாபீடம் என்னும் யானையைக்
அட்டானை -கொன்றவனுமான திருமாலை
மறந்து உலகோர்
வருந்து வரைப்பட்ட வீப்போன் மடந்தையர் மால்வலைக்கே =
வருந்துவர் ஐ பட்ட ஈ போல் -கோழையில் அகப்பட்டு மீள ஒண்ணாதபடி
சிக்கிக் கொண்டு இழிகிற ஈயைப் போலே -மகளிர் பக்கல் கொள்ளும் மோகம் ஆகிய
வலையிலே அகப்பட்டு மீள மாட்டாது வருந்துவர்-

ருக்மிணி -சத்யபாமை -ஜாம்பவதி -சத்யை -மித்ரவிந்தை -ஸு சிலை -ரோகிணி -லஷணை
என்கிற எட்டு பட்ட மகிஷிகள்
துவரை வரும் -கண்ண பிரானுக்கும் திருத் தேவிமார்களுக்கும் அடைமொழி.

————————————————————————————-

மாலைக்கல்லார மடவார் புண்ணாக்கையில் வாஞ்சை வைத்து
மாலைக்கல்லாரம் புலிக்கு நையா நிற்பர் மாய்விப்பதோர்
மாலைக்கல்லாரம் புயத்தாளில் வைக்கும் மதில் அரங்க
மாலைக்கல்லார் அஞ்சலி யார் என்னே சில மானிடரே ——–14

மாலைக்கல்லார மடவார் புண்ணாக்கையில் வாஞ்சை வைத்து =
மாலைக் கல்லாரம் -மாலையாகத் தொடுக்கப்பட்ட செங்கழு நீர் மலர்களை சூடிய
மாதர்கள் உடைய அசுத்தமான உடம்பிலே விருப்பம் வைத்து அக்காமத்தினால்
மாலைக்கல்லாரம் புலிக்கு நையா நிற்பர்
மாலைக்கு அல் ஆர் அம்புலிக்கு நையா நிற்பர் -காம உத்தீபகப் பொருள்களான
அந்தி மாலைப் பொழுதுக்கும் இரவில் விளங்குகின்ற சந்த்ரனுக்கும் வருந்தி நிற்பார்கள்
மாய்விப்பதோர் -மாலைக்கல்லார் =தங்களை அழியச் செய்வதான ஒப்பற்ற காம மயக்கத்தை
களைந்து ஒழிக்க மாட்டார்கள் -கல்லல் =கல்லுதல் -வேரூன்றினதை பெயர்த்து ஒழித்தல் –
அம்புயத்தாளில் வைக்கும் மதில் அரங்க மாலைக்கல்லார் அஞ்சலி யார் என்னே சில மானிடரே =
தாமரை போன்ற தனது திருவடிகளில் அடியார்களை இருத்துகிற
திருமதில்கள் சூழ்ந்த திருவரங்கத்தில் பள்ளி கொண்டு இருக்கிற திருமாலை
கல்லார் =துதிக்க மாட்டார்கள் –
அஞ்சலியார் = கை கூப்பி வணங்க மாட்டார்கள்
என்னே=இது என்ன பேதமையோ

மானிடர் -மனுஷ்யர் -காசிப முனிவர் மனைவியுள் மனுவின் சந்ததியார் என்று காரணப்பொருள் ஆகவுமாம்

——————————————————————————

மானிடராக வரலரிதோர் மண்டலத்தின் நெறி
மானிடராக மிலாதவராதன் மலரயனார்
மானிடராகமத்தாலன்பராய வரங்கத்துள் எம்
மானிடராகமலரடிக்கு ஆட்படும் வாழ்வரிதே ——–15

மானிடராக வரலரிதோர் மண்டலத்தின் -ஓர் மண்டலத்தின் மானிடராக வரல் அரிது
அப்படி மனித ஜன்மம் எடுத்தாலும்
நெறி மானிடராக மிலாதவராதன் -இடர் ஆகம் இலாதவர் ஆதல் அரிது -நெறிமான் ஆதல் அரிது =
நீதி நெறி உடையவனாய் இருத்தல் அதினினும் அரிது
அங்கனம் சன்மார்க்கத்தில் ஒழிகினாலும்
மலரயனார் -மலர் அயனார் =தாமரை மலரில் தோன்றிய பிரமதேவரும்
மானிடராகம் -மான் இடர் ஆகமத்தாலன்பராய=மானை இடக்கையில் ஏந்திய சிவபிரானும்
சாஸ்த்ரங்களில் கூறிய முறைப்படி -அன்பர் ஆய =தொண்டு பூண்டு ஒழுகுதற்கு இடமான
வரங்கத்துள் எம் மானிடராகமலரடிக்கு ஆட்படும் வாழ்வரிதே –
அரங்கத்துள் எம்மான் இடர் ஆகம் மலர் -அடிக்கு -பெருமை உடைய சிறந்த தாமரை போலே
திருவடிகளுக்கு அடிமை செய்து ஒழுகுகிற வாழ்க்கை அருமையானது

அரியது கேட்கின் வரிவடிவேலாய் அரிது அரிது மானிடராதல் அரிது
மானிடர் ஆயினும் கூன் குருடு செவிடு பேடு நீக்கிப் பிறத்தல் அரிது
பேடு நீக்கிப் பிறந்த காலையும் ஞானமும் கல்வியும் நயத்தல் அரிது
ஞானமும் கல்வியும் நயந்த காலையும் தானமும் தவமும் தான் செய்தல் அரிது
தானமும் தவமும் தான் செய்வர் ஆயின் வானவர் நாடு வழி திறந்திடுமே-

————————————————————————————-

அரி தாமரைக்கண் தோல் உடுத்தார் அயனார்கு அரியான்
அரி தாமரைக்கண் அம்மான் திருப்பாதம் அடைமின் சன்மம்
அரி தாமரைக்கணம் தங்காது உயிர் அவனூர் வினவில்
அரி தாமரைக்கணம் ஈர்த்து ஓடும் பொன்னி யரங்கம் அன்றே ———16

அரி தாமரைக்கண் தோல் உடுத்தார் அயனார்கு அரியான் =
அரி-இந்தரனுக்கும் -தாம் அரைக்கண் அம் தோல் உடுத்தார் -தாம் இடையிலே அழகிய
புலித் தோலை உடுத்துள்ளவரான சிவபிரானுக்கும் அறிதற்கு அரியவனும்

அரை -பாதி -உடம்பில் பாதி அளவில் உள்ள உறுப்பான இடையைக் குறிக்கும்
அரி தாமரைக்கண் அம்மான் திருப்பாதம் அடைமின் -ஹரி என்னும் திருநாமம் உடைய
செந்தாமரை மலர் போன்ற திருக் கண்களை உடைய தலைவனான எம்பெருமானின்
திருவடிகளை சரண் அடையும் கோள்

அரி -காண்பவர்கள் கண்களையும் மனத்தையும் கவருகிற தாமரைக் கண்ணன்
அதனால் பயன் என்ன எனின்
சன்மம் அரி தாமரைக்கணம் தங்காது உயிர் -சன்மம்  அரிதாம் -மீண்டும் பிறப்பு இல்லாமல்
-போகும் –உயிர் அரைக்கண் தங்காது -சரணம் அடைபவர் உயிர் முக்தி புகுமே அன்றி
மறுபடி ஓர் உடம்பில் அரை ஷண பொழுதும் பொருந்தி நிற்க மாட்டாது
அவனூர் வினவில் –
அரி தாமரைக்கணம் ஈர்த்து ஓடும் பொன்னி யரங்கம் அன்றே -அரி தாம் மரை கணம்
ஈர்த்து ஓடும் பொன்னி அரங்கம் அன்றே -சிங்கங்களையும் தாவிப்பாயும் மான் கூட்டத்தையும்
ஒருங்கு இழுத்துக் கொண்டு ஓடி வருகிற உபய காவேரியின் மத்தியில் உள்ள திருவரங்கம் அன்றோ

அரி -யானை முதலிய விலங்குகளை அரிப்பது -அரித்தல் -அழித்தல்

மலைத்தலைய கடற்காவேரி புனல் பரந்து பொன் கொழிக்கும் என்றபடி தான் பெருகும் பொழுது
பொன்னைக் கொழித்துக் கொண்டு வருவதால் காவேரிக்கு பொன்னி என்ற பெயர்

————————————————————————————

அரங்காதுவார் கணை கண் வள்ளை கோங்கின் அரும்பு மங்கை
அரங்காதுவார் முலை என்று ஐவர் வீழ்ந்தனர் ஆடரவின்
அரங்காதுவாரமிலா மணியே யணியார் மதில் சூழ்
அரங்காதுவாரகையாய் அடியேன் உன் அடைக்கலமே ———-17

அரங்காதுவார் கணை கண் வள்ளை கோங்கின் அரும்பு மங்கை அரங்காதுவார் முலை என்று ஐவர் வீழ்ந்தனர் –
மங்கையர் -இள மகளிருடைய கண்கள் அரம் காதுவார் கணை -அரம் என்னும் கருவியினால்
அராவப்பட்ட கூறிய நீண்ட அம்பு போலும் -அம் காது வார் முலை -அழகிய காதுகளும்
கச்சு இறுக்கிய கொங்கைகளும் -வள்ளை கோங்கின் அரும்பு -முறையே வள்ளை என்னும்
நீர்க்கொடியின் இலையையும் கோங்க மரத்தின் அரும்பையும் போலும் -என்று -உவம முகத்தால்
புனைந்து கருதி ஐவர் வீழ்ந்தனர் -பஞ்சேந்த்ரியங்களான ஐந்து பேர் அம் மகளிர் பக்கல் ஆசை கொண்டு –

அப்பெண் மோகக் கடலில் விரைந்து விழுந்தன்மையர்
ஆடரவின் அரங்காதுவாரமிலா மணியே -ஆடு அரவின் இன் அரங்கா -படம் எடுத்து ஆடுகிற
காளியன் என்னும் பாம்பை இனிய கூத்தாடும் இடமாக கொண்டவனே –
துவாரம் இலா மணியே -புரைசல் இல்லாத முழு மாணிக்கம் போன்றவனே
யணியார் மதில் சூழ் அரங்காதுவாரகையாய் அடியேன் உன் அடைக்கலமே –
அணி ஆர் மதில் சூழ் அரங்கா -துவாரகையாய் -அடியேன் உன் அடைக்கலம்

—————————————————————————————-

அடைக்கலந்தாயத்தவர் போலுடலுறையை வரையும்
அடைக்கலந்தாவுலகம் கொண்ட தாள்களுக்கண்ட முண்டால்
அடைக்கலந்தாயரங்கா வாயர்பாடியிலன்று நெய்பால்
அடைக்கலந்தாய் வைத்து வாய் நெரித்தூட்ட வழுமையனே——–18

அடைக்கலந்தாயத்தவர் போலுடலுறையை வரையும்
உடல் உறை ஐவரையும் அடைக்கலம் -விஷயாந்தரங்களில் இந்த்ரியங்களை செல்ல ஒட்டாமல் அடக்கி வசப்படுத்தி
வைக்க வல்லமை உடையோம் அல்லோம் -தாயத்த்வர் போல் -பங்காளிகள் போலே –
அடைக்கலந்தாவுலகம் கொண்ட தாள்களுக்கண்ட முண்டால்
தாய் உலகம் கொண்ட தாள்களுக்கு அடைக்கலம்
அண்டம் உண்டு ஆல் ஆடை கலந்தாய் -ஆலிலையில் சேர்ந்து பள்ளி கொண்டவனே -அரங்கா
அடைக்கலந்தாயரங்கா வாயர்பாடியிலன்று நெய்பால் அடைக்கலந்தாய் வைத்து வாய் நெரித்தூட்ட வழுமையனே
பாலடை கலம் வைத்து -பாலாடையாகிற பாத்திரத்தில் பெய்து கொண்டு -அன்று
ஆயர்பாடியிலே  யசோதை நெய்யை வாய் நெரித்து ஊட்ட -அழும் ஐயனே

—————————————————————————————

ஐயமருந்திவை யுண்என்று மாதர் அட்டு ஊட்டும் செல்வம்
ஐயமருந்தினைப்போதே அவர் இன்பம் ஆதலினால்
ஐயமருந்தியக்கங் குறுகா முன் அரங்கற்கு அன்பாய்
ஐயமருந்தயும் வாழ்மின் கண் மேல் உனக்கு ஆநந்தமே ——–19

ஐயமருந்திவை யுண்என்று மாதர் அட்டு ஊட்டும் செல்வம்
ஐய இவை -இவ் உணவுகள் -மருந்து -இன்சுவை மிகுதியால் தேவாமிருதம் போன்றன-
உண் -உண்ணக் கடவை  என்று -அன்பு பாராட்டி உபசார வரத்தை சொல்லி -மாதர் அட்டு ஊட்டும் –
தாமே சமையல் செய்து உண்பிக்கும் -செல்வம் -ஐஸ்வர்யம்
ஐயமருந்தினைப்போதே அவர் இன்பம் ஆதலினால்
ஐயம் -சந்தகதுக்கு இடமானது -நிலையற்றது என்றபடி -அருந்தினைப் போதே -சிறிய
தினை  என்னும் தானியத்தின் அளவிதான அதி சொற்ப காலத்தே -ஆதலினால் –
ஐயமருந்தியக்கங் குறுகா முன் அரங்கற்கு அன்பாய்
ஐ அமரும் தியக்கம் குறுகா முன் -கோழை கண்டத்தில் பொருந்துகிற கலக்கம் –
அந்திம திசையில் ஆகின்ற தடுமாற்றம் -நெருங்குவதற்கு முன்னமே –
அரங்கற்கு அன்பாய்
ஐயமருந்தயும் வாழ்மின் கண் மேல் உனக்கு ஆநந்தமே –
ஐயம் அருந்தியும் -பிச்சை எடுத்துப் புசித்தாயினும் -அரங்கன் விஷயத்தில்
பக்தி கொண்டு ஜீவியுங்கோள் -இப்படி செய்வீர் ஆயின் -மேல் -இப்பிறப்பு ஒழிந்த அளவில் –
உங்களுக்கு நித்ய ஆனந்தம் பரம பதம் உண்டாகும்

செல்வம் இன்பம் இளமை யாக்கை நிலையாமை விளக்கி
புலன்கள் நைய மெய்யில் மூத்துப் போந்திருந்து உள்ளம் எள்கிக்
கலங்க ஐக்கள் போத உந்திக் கண்ட பிதற்றா முன்
அலங்கலாய தண் துழாய் கொண்டு ஆயிரம் நாமம் சொல்லி
வலம்கொள் தொண்டர் பாடியாடும் வதரி வணங்குதுமே -பெரிய திருமொழி
மேல் ஆநந்தம் -மேன்மையான ஆநந்தம் -என்னவுமாம்

——————————————————————————-

நந்தமரங்கனை மா கடல் ஏழு நடுங்க எய்த
நந்தமரங்கனைப் பற்று நெஞ்சே வினை நையும் முன்கை
நந்தமரங்கனையார் மயல்போம் வரு நற் கதிவா
நந்தமரங்கனைவர்க்கும் எஞ்ஞான்று நரகில்லையே ———20

நந்தமரங்கனை மா கடல் ஏழு நடுங்க எய்த
மரம் ஏழும் நந்த -கனை மா கடல் ஏழும் நடுங்க -எய்த
நந்தமரங்கனைப் பற்று நெஞ்சே வினை நையும் முன்கை
நம் தம் அரங்கனை -நம்பெருமாளை -பற்று நெஞ்சே -வினை நையும் –
முன் கை நந்து
நந்தமரங்கனையார் மயல்போம் வரு நற் கதிவா
நந்து அமர் அங்கனையார் மையல் போம் -முன்னம் கைகளிலே சங்கம் வளையல்கள் பொருந்திய
மாதர்கள் பக்கலில் உண்டாகும் ஆசை மயக்கமும் ஒழியும் -நல்  கதி வானம்
நந்தமரங்கனைவர்க்கும் எஞ்ஞான்று நரகில்லையே –
தமர் அனைவர்க்கும் எஞ்ஞான்றும் நரகு இல்லையே
ஏழும் -மரங்களிலும் கடல்களிலும் கூட்டிப் பொருள் கொள்க
நந்து சங்கு -அதனாலாகிய வளைக்கு கருவி ஆகுபெயர்

—————————————————————————–

நரகந்தரம்புவி இம்மூன்று இடத்தும் நனி மருவு
நரகந்தரங்கித்து வெம் காலற்கு அஞ்சுவர் நாயகவா
நரகந்தரம்புள் பிடறு ஏறு அரங்கர் நல் ஆய்க்குலத்தி
நரகந்தரங்க முற்றார் அடியார்க்கு நமன் அஞ்சுமே ———-21

நரகந்தரம்புவி இம்மூன்று இடத்தும் நனி மருவு
நரகம் அந்தரம் புவி இம் மூன்று இடத்தும் -நனி மருவுநர் -மிகுதியாகப்
பொருந்தி உள்ள ஜனங்களும் –
நரகந்தரங்கித்து வெம் காலற்கு அஞ்சுவர் நாயகவா
நர் அகம் தரங்கித்து வெம் காலற்கு அஞ்சுவர் -மனம் அலைந்து கொடிய யமனுக்கு
பயப்படுவார்கள்
நரகந்தரம்புள் பிடறு ஏறு அரங்கர் நல் ஆய்க்குலத்தி
நாயக வாநர நந்தரம் புள் பிடர்  ஏறு அரங்கர் -அனுமான் திருக் கழுத்தின் மேலும்
கருடன் பிடரி மேலும் ஏறுகிற திருவரங்கரும்
நல் ஆய்க்குலத்து இநர் -இடையர் குலத்தில் வளர்ந்து விளக்கின சூர்யன் போன்றவரும்
நரகந்தரங்க முற்றார் அடியார்க்கு நமன் அஞ்சும்
தரங்கம் அகம் உற்றார் -திருப்பாற் கடலை வசிக்கும் இடமாகக் கொண்டு
அங்கு வாழ்பவர் ஆன நம்பெருமாள் உடைய -அடியார்க்கு நமன் அஞ்சும்

————————————————————————————

அஞ்சு அக்கரம் தலை கங்கையன் எற்றலும் அஞ்சிறைய
அஞ்சம் கரத்தலை குண்டிகையான் மண்டை அம் கை விட்டே
அஞ்ச கரத்தலை செய்து பித்து ஏக அருள் அரங்கன்
அம் சக்கரத் தலைவன் தாள் அலால் மற்று அரண் இலையே–22

அஞ்சு அக்கரம் தலை கங்கையன் எற்றலும் –
பஞ்சா ஷர மந்த்ரத்துக்கு உரியவனும்
தலையில் கங்கையை தரித்தவனும் ஆன சிவபெருமான் இரந்த அளவிலே
அஞ்சிறைய அஞ்சம் கரத்தலை குண்டிகையான்
அழகிய சிறகுகளை உடைய ஹம்ச வாகனத்தையும்
கையில் கமண்டலத்தையும் உடையனான பிரமனது
மண்டை அம் கை விட்டே அஞ்ச கரத்தலை செய்து-
கபாலமானது சிவன் உள்ளம் கையை நீங்கி மறைதளைச் செய்து விலகவும்
பித்து ஏக –
அந்த சிவன் திகைப்பு ஒழியவும்
அருள் அரங்கன் அம் சக்கரத் தலைவன்
கருணை செய்த
அழகிய சக்கரத்தாழ்வாரை உடைய
இறைவனான ஸ்ரீ ரெங்கநாதன் உடைய
தாள் அலால் மற்று அரண் இலையே –
திருவடியே அல்லால்
வேறு ரஷகம் எவ் உயிர்க்கும் இல்லை

—————————————————————————–

இலங்கை யிலாதரனைங்கரன் மோடி யெரி சுரத்தோன்
இலங்கை யிலாத மலையான ஈசன் இரிய வெம்போரில்
இலங்கை யிலாதபடி வாணனைச் செற்ற வென்னரங்கன்
இலங்கை யிலாதவன் போகக் கண்டான் என் இதயத்தனே–23

இலங்கை யிலாதரனைங்கரன் மோடி யெரி சுரத்தோன்
இலங்கு ஆயில் ஆதரன் -விளங்கும் வேலாயுதத்தின் இடத்து விருப்பம் உடைய சுப்பிரமணியனும்
ஐங்கரன் -நான்கு கை துதிக்கை உடைய விநாயகனும்
மோடி -துர்க்கையும்
யெரி -அக்னியும்
சுரத்தோன் -ஜுரத் தேவதையும்
இலங்கை யிலாத மலையான ஈசன் இரிய வெம்போரில்
இலம் கயிலாத மலையான ஈசன் -வசிக்கும் இடம் கைலாச கிரியாகப் பெற்ற சிவனும்
இரிய -அஞ்சி நிலை கெட்டு ஓடி
வெம்போரில் -உக்ரமான யுத்தத்தில்
இலங்கை யிலாதபடி வாணனைச் செற்ற வென்னரங்கன்
அம் கை இலாத் படி
வாணனைச் செற்ற வென்னரங்கன்
இலங்கை யிலாதவன் போகக் கண்டான் என் இதயத்தனே
இலங்கையில் ஆதவன் சூர்யன் போகும்படி செய்த திருமால்
எனது ஹிருதய கமலத்தில் உள்ளான்

ஆதபன் -நன்றாக தபிப்பவன்

—————————————————————————————-

அத்தனை வேதனை ஈன்ற அரங்கனை ஐம்படை சேர்
அத்தனை வேதனை வாய் வைத்த மாயனை ஆர் அணங்கு ஓர்
அத்தனை வேதனை தீர்த்தானைச் சேர்க்கிலள் ஆயிரம் சால்
அத்தனை வேதனை யப்புவள் சாந்து என்று அனல் அரைத்தே —-24

அத்தனை வேதனை ஈன்ற அரங்கனை
அத்தனை -எப்பொருட்கும் இறைவனை
வேதனை ஈன்ற அரங்கனை -பிரமனைப் பெற்ற திருவரங்கனும்-வேதன் -வேதம் வல்லவன் நான்முகன்

ஐம்படை சேர் அத்தனை -பஞ்சாயுதங்கள் பொருந்திய திருக் கைகளை உடையவனும்

வேதனை வாய் வைத்த மாயனை –
வேய்ங்குழலை திரு வாயில் வைத்து உஊதிய மாயவனும்

ஆர் அணங்கு ஓர் அத்தனை வேதனை தீர்த்தானைச் –
அருமையான தெய்வ மகள் பார்வதியை உடம்பில் பாதியில் உடைய
சிவ பெருமான் உடைய துயர் தீர்த்து அருளின அழகிய மணவாளனை

சேர்க்கிலள் -என்னுடன் சேரச் செய்யாள்
அனை -அன்னை -என்னுடைய தாய்
பின்னை என் செய்வாள் என்றால்

ஆயிரம் சால் அத்தனை வேதனை யப்புவள் சாந்து என்று அனல் அரைத்தே —
சாந்து என்று அனல் அரைத்து
ஆயிரம் சால் அத்தனை வேது அப்புவள்
ஆயிரம் சால் அவ்வளவு வெப்பத்தை என் உடம்பில் பூசி நிரப்புவள்

தலை மகள் பாசுரம்–தலைவி இரங்கல்

——————————————————————————–

அரைக்கலை வேலை யுடுத்த மண் பல் பகலாண்டு பற்றல்
அரைக்கலை வேலை யுடை வேந்தர் வாழ் வெண்ணலை வரையும்
அரைக்கலை வேலை யவர்க்கே புரிவை என்றாலு நெஞ்சே
அரைக்கலை வேலை யரங்கனுக்கு யாட்பட வாதரியே———25

நெஞ்சே -என் மனமே

அரைக்கலை வேலை யுடுத்த
அரைக்கு அலை வேலை உடுத்த -அரையினிடத்து அலைகளை உடைய கடலை ஆடையாகத் தரித்த

மண்-பூமியை

பல் பகலாண்டு -பல நாள் அளவும் அரசாண்டு
பற்றல் அரைக்கலை வேலை யுடை
பற்றலரை கலை வேலை யுடைய -பகைவர்களை நிலை குலைந்து ஓடச் செய்கிற வேலாயுதத்தை உடைய

வேந்தர் வாழ் வெண்ணலை வரையும்
வேந்தர் -அரசர் களது
வாழ் -நிலை அற்ற வாழ்க்கையை
எண்ணல்-ஒரு பொருளாகக் கருதாதே
ஐவரையும் -பஞ்ச இந்த்ரியங்களையும்

அரைக்கலை வேலை யவர்க்கே புரிவை என்றாலு
அரைக்கலை -நீ அடக்க மாட்டாமல்
அவர்க்கே வேலை புரிவை என்றாலும் -அந்த இந்த்ரியங்களுக்கே வசப்பட்டு வேலை -பணிவிடை செய்வாய் ஆயினும்

அரைக்கலை வேலை யரங்கனுக்கு யாட்பட வாதரியே–
அரை கலை வேலை -அரைக் கணப் பொழுதாயினும்
அரங்கனுக்கு ஆட்பட ஆதரி -அரங்கனுக்கு அடிமை செய்ய விரும்புவாய்

கண் இமைப் பொழுது பதினெட்டு கூடினால் ஒரு காஷ்டை
முப்பது காஷ்டைகள் கூடினால் ஒரு கலை -கால அளவு

————————————————————————————

கோயில் கந்தாடை அப்பன் திருவடிகளே சரணம்
ஸ்ரீ பிள்ளை பெருமாள் ஐயங்கார் திருவடிகளே சரணம்
பெரிய பெருமாள் பெரிய பிராட்டியார் ஆண்டாள் ஆழ்வார் எம்பெருமானார் ஜீயர் திருவடிகளே சரணம்

This entry was posted on February 7, 2016 at 12:56 pm and is filed under அஷ்ட பிரபங்கள். You can follow any responses to this entry through the RSS 2.0 feed. You can leave a response, or trackback from your own site.